ILIANA YOTOVA TA LASHE ZAƁEN SHUGABANCIN ƘASAR BULGARIA

Sakamakon ƙuri’un da aka ƙirga ya nuna cewa Yotova ta samu kusan kashi 57.58 cikin 100 na ƙuri’un da aka kaɗa, inda ta doke abokin hamayyarta, Andrey Gyurov, wanda ya samu kashi 39.46 cikin 100.

Wannan nasara ta sa Yotova ta zama mace ta farko da aka zaɓa kai tsaye domin shugabantar ƙasar Bulgaria. Ta kuma samu gagarumar nasara a gundumomi da dama na ƙasar, yayin da Gyurov ya amince da sakamakon zaɓen tare da taya ta murna.

A zagayen farko na zaɓen da aka gudanar a makon da ya gabata, Yotova ta samu kashi 34.76 cikin 100 na ƙuri’u, yayin da Gyurov ya samu kashi 31.95. Rashin samun rinjayen da ake buƙata ne ya sa aka gudanar da zagaye na biyu tsakanin ’yan takarar biyu.

A lokacin yaƙin neman zaɓe, Yotova ta bayyana matsayarta na adawa da ƙarin tallafin makamai ga Ukraine, inda ta fi karkata ga neman hanyar diflomasiyya domin kawo ƙarshen yaƙin da Rasha. Wannan matsaya ta bambanta da ta abokin hamayyarta, wanda ya fi nuna goyon baya ga ƙarfafa haɗin gwiwar tsaro da ƙasashen Yamma.

Nasara ce mai muhimmanci ga Yotova, wadda ta taɓa riƙe muƙamin mataimakiyar shugaban ƙasa kafin ta zama shugabar riƙon ƙwarya a watan Janairun bana. Ana sa ran za ta jagoranci ƙasar na wa’adin shekaru biyar, yayin da ake sa ido kan yadda za ta tafiyar da alaƙar Bulgaria da Tarayyar Turai da kuma batun yaƙin Ukraine.