Sarkin Kano Ya Gudanar da Hawa Na Farko a Tarihin Masarautar

Sarkin ya fito ne ta Kofar Kwaru, ya bi ta titin Mandawari zuwa Kwanar Diso, sannan ya bulla ta Galadanci zuwa Gwale, yayin da dubban al’umma suka yi cincirindo a gefen hanyoyin domin kallon hawan da yi wa Mai Martaba gaisuwa.

Abin da ya fi jan hankali yayin hawan shi ne yadda Mai Martaba ya riƙa tsayawa a duk lokacin da ya ga taron jama’a, domin yi musu addu’o’in neman zaman lafiya, haɗin kai da kwanciyar hankali a tsakanin al’ummar Kano.

1

Daga cikin mutanen da Sarkin ya tsaya a wurinsu akwai tsohon Alƙali, Bashir Ahmad, wanda ya gabatar da gaisuwar ban girma ga Mai Martaba Sarkin Kano.

A halin yanzu, Mai Martaba yana kusa da Asibitin Yara na Hasiya Bayero, inda yake karɓar gaisuwa daga hakimai da al’umma daban-daban da suka fito domin nuna masa goyon baya da girmamawa.

1

Daga bisani Mai Martaba ya sauka daga kan dokinsa, inda ya hau rakumi domin ci gaba da hawan zuwa sauran wuraren da aka tanada, yayin da jama’a ke ci gaba da tururuwa domin ganin wannan gagarumin biki na Hawan Maulidi.