Hukumar Alhazai ta Kano Ta Samu Lambar Yabo Daga Hukumar Shige da Fice ta Najeriya

An bai wa Darakta Janar na Hukumar Kula da Alhazai ta Kano, Alhaji Abubakar Ibrahim Matawalle, lambar yabon ne saboda jajircewa da ƙoƙarinsa wajen tallafa wa ayyukan Hukumar Shige da Fice, musamman wajen tabbatar da cewa mahajjatan Kano sun samu fasfo cikin sauƙi ba tare da jinkiri ba.

Mai magana da yawun Hukumar Kula da Alhazai ta Kano, Suleman Dederi, ne ya bayyana hakan cikin wata sanarwa. Yayin bikin miƙa lambar yabon, Jami’in Kula da Fasfo na Farm Centre, Kano, Alhaji Aliyu Hamisu Nguroje, ya yaba wa Matawalle bisa kulawar da yake bai wa mahajjatan jihar.

2

Ya ce a lokacin aikin Hajjin da ya gabata, Daraktan ya nuna ƙwazo wajen tabbatar da cewa mahajjatan sun samu dukkan taimakon da suke buƙata yayin neman fasfo.

A nasa jawabin, Alhaji Abubakar Ibrahim Matawalle ya gode wa Hukumar Shige da Fice bisa karramawar, yana mai cewa hukumar za ta ci gaba da ƙarfafa haɗin gwiwa da hukumomin gwamnati masu ruwa da tsaki domin sauƙaƙa wa al’ummar Kano gudanar da aikin Hajji.

Ya kuma yaba wa Ofishin Fasfo na Farm Centre bisa haɗin gwiwa da kuma ƙoƙarin da yake yi wajen hanzarta fitar da fasfo ga mahajjata, tare da tabbatar da cewa ba a samu jinkirin da ba dole ba.