Allah Ya yi wa Mai Martaba Sarkin Gumel na Jihar Jigawa, Alhaji Ahmad Muhammad Sani, rasuwa.

Marigayin ya shafe sama da shekaru 45 yana kan karagar mulkin Masarautar Gumel, bayan hawansa karagar mulki a shekarar 1981. Rasuwarsa ta jefa al’ummar Masarautar Gumel da Jihar Jigawa cikin jimami.

An haifi Sarkin Gumel a ranar 12 ga Disamba, 1942, kuma kafin hawansa karagar mulki ya yi aiki a fannoni daban-daban na gwamnati, ciki har da zama Kwamishinan Yaɗa Labarai, Harkokin Cikin Gida da Al’adu na tsohuwar Jihar Kano.

Rasuwar Mai Martaba na zuwa ne ƙasa da shekara guda bayan gudanar da bikin cika shekaru 45 da hawansa karagar mulki, abin da ya sa rasuwar ta zama babban rashi ga Masarautar Gumel da al’ummar jihar Jigawa.

A halin yanzu, ana jiran ƙarin bayani daga Masarautar Gumel da gwamnatin Jihar Jigawa kan shirye-shiryen jana’izar marigayin da lokacin da za a gudanar da sallar jana’izarsa.